ROSA Crucis

ROSA Crucis

nomen Congregationis, quae sub initium saeculi huius, in Germania, emersit. Huic qui nomen dant, Fratres Rosae crucis dicti, iurant se secretum non propalaturos, aenigmatice sibi invicem scribunt, et Societatis leges se servaturos sancte pollicentur. Iactant se omnium Disciplinarum scientiarumque, Medicinae inprimis, quam hactenus ignotam incultamque iacuisse dicunt, Restauratores: Arcana varia maximi momenti se nôsse, inter quae minimum sit Philosophicus lapis, illa mque notitiam per Traditionem, ab antiquis Aegypti Philosophis, Chaldaeis, Magis et Gymnosophistis hausisse se gloriantur. Dicunt insuper, A. C. 1378. nobilem quendam Germanum, cuius nomem per A. C. exprimunt, postquam in monasterio quodam Graecam Latinamque linguam addidicisset, in Palaestinam profectum, cumque Damasci aeger Sapientes Arabiae consuluisset, ab illis admirandam hanc artem edoctum, post reditum in patriam, sociis allectis, illos tantorum secretorum participes reddidisse, Obiisse autem huncce, A. C. 1484. Fratres hi successores habuerunt, usque ad A. C. 1604. quô unus ex illis, in sepulchrum Fundatoris, variis emblematis, characteribus et inscriptionibus variegatum, cum literis A. C. R. C: incidisse dicitur: ibi librô repertô, in charta pergamena aureis literis scripto. Hi, quia vitam hominis communiter ad an. 140. se extensuros promittunt, Immortales; quia tam sublimia iactant, Illuminati, sed quia ab aliquo tempore, post tot fraudes deprehensas, non in publico comparent, invisibiles dicuntur: Empiricorum abortus haec secta est. Quod Illuminatos Hispaniae attinet, quidam similis farinae homines illos, alii vero longe melioris notae esse, existimant. Vide Illuminati.